“4Sİ Akademiyası” çərçivəsində vətəndaşlar müasir əmək bazarının tələblərinə uyğun bilik və bacarıqların inkişafına xidmət edən 103 kitabdan elektron formatda Azərbaycan dilində ödənişsiz yararlana biləcəklər.
İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM) tərəfindən həyata keçirilən “4Sİ Akademiyası” çərçivəsində yeni maarifləndirici layihəyə başlanılır. Layihə çərçivəsində İqtisadiyyat Nazirliyinin dəstəyi ilə SOCAR tərəfindən hazırlanmış, idarəetmə və biznes sahələrinə dair dünyanın tanınmış müəlliflərinin 103 kitabı vətəndaşların istifadəsinə verilir.
Layihənin əsas məqsədi dördüncü sənaye inqilabının yaratdığı dəyişikliklərə uyğun insan kapitalının inkişafına, sürətlə dəyişən əmək bazarının tələblərinə cavab verən kadrların hazırlanmasına və müasir idarəetmə bacarıqlarının formalaşdırılmasına dəstək göstərməkdir.
Süni intellekt, avtomatlaşdırma və digər qabaqcıl texnologiyaların iş proseslərini dəyişdirdiyi bir dövrdə əmək bazarında yalnız texniki biliklərə deyil, həm də analitik və yaradıcı düşüncə, problem həll etmə, dəyişikliklərə uyğunlaşma, liderlik və komanda işi kimi bacarıqlara tələbat artır. Yeni layihə məhz bu bacarıqların inkişafına töhfə verməklə vətəndaşların peşəkar rəqabət qabiliyyətinin yüksəldilməsini hədəfləyir.
Kitablar www.pocketbook.az elektron kitabxanası vasitəsilə təqdim olunur. Platformada müasir idarəetmə, insan resurslarının inkişafı, liderlik, yaradıcı düşüncə, ünsiyyət və digər istiqamətlər üzrə 10 kateqoriyada Azərbaycan dilində kitablar yer alır.
Elektron kitabxanada yer alan “Dəyişikliyin idarə edilməsi”, “İnnovasiyanın təşviqi”, “Strategiya”, “Qərarların qəbul edilməsi”, “Layihənin idarə edilməsi”, “Virtual komandalar”, “Liderlik” və “Səriştələr” kimi kitablar müəssisələrdə texnoloji transformasiya proseslərinin səmərəli idarə olunması, innovativ yanaşmaların tətbiqi, strateji qərarların qəbulu və yeni iş mühitinə uyğunlaşma baxımından əhəmiyyətli biliklər təqdim edir. Bu istiqamətlər Sənaye 4.0 dövründə həm rəhbər şəxslər, həm də müxtəlif sahələr üzrə mütəxəssislər üçün vacib olan bacarıqların inkişafına xidmət edir.
Elektron kitabxanadan istifadə tam ödənişsizdir. Kitabları kompüter, planşet və mobil telefon vasitəsilə onlayn oxumaq, həmçinin PDF formatında yükləyərək internet bağlantısı olmadan mütaliə etmək mümkündür. Yaşayış yerindən asılı olmayaraq hər bir vətəndaş istənilən vaxt bu bilik resurslarından faydalana bilər.
Yeni təşəbbüs “4Sİ Akademiyası”nın insan kapitalının inkişafı, müasir bilik və bacarıqların əlçatanlığının artırılması və ömürboyu öyrənmə imkanlarının genişləndirilməsi istiqamətində fəaliyyətinin davamıdır. Kitablarla tanış olmaq üçün: www.pocketbook.az
