“Qış rejiminə keçən kimi gəlib istilik borularını bağlayıblar, qalmışıq soyuqda. Halbuki nə qaza, nə də istiliyə borcumuz var”.
Bu şikayətlə “Qafqazinfo”ya Şirvan rayonu, F. Xoyski küçəsində 685 ailənin yaşadığı məcburi köçkün qəsəbəsinin sakini Mustafa Məmmədov müraciət edib.
Onun sözlərinə görə, ötən il də eyni problemlə üzləşiblər: “Bizə deyirlər ki, ortada 350-400 min manatlıq borc məsələsi var. Halbuki, biz sakinlərin istiliyə borcumuz yoxdur. Hər ay aldığımız istiliyə görə 15-20 manat ödəniş eləmişik. Ötən il də eyni problem yaşanmışdı. Sakinlər hər yerə şikayət yazdılar, yolu kəsdilər, nəhayət yanvar ayında istilik verildi. Bu il də gəlib boruları kəsiblər. 13 ədəd 9 mərtəbəli bina istiliksiz qalıb. Nəinki binalar, həmçinin yaxınlıqdakı Zəngilan və Füzuli rayonundan olan məcburi köçkünlər üçün salınmış orta məktəblər də istiliksizdir. Nəticədə uşaqlarımız da məktəbə gedə bilmirlər. Ən yaxşı halda həftədə bir dəfə dərsə, qalan vaxtı müəllimlərin evlərinə hazırlığa gedirlər”.
.jpg)
Məsələ ilə əlaqədar “Azəristiliktəchizat” ASC ilə əlaqə saxladıq. Qurumdan sorğumuza cavab olaraq bildirildi ki, Şirvan şəhərində qaçqın və məcburi köçkünlər üçün inşa edilmiş şəhərciklərdə yerləşən binaların istilik təminatı “Azəristiliktəchizat” ASC-nin xidmət zonasına daxil deyil və onların istilik təchizatı ilə bağlı müraciətlər bu binaların sahibləri və ya mülkiyyətçilərinə, o cümlədən Qaçqın və Məcburi Köçkünlərin işləri üzrə Dövlət Komitəsinə edilməlidir: “Bu şəhərciklər Qaçqın və Məcburi Köçkünlərin işləri üzrə Dövlət Komitəsi tərəfindən inşa edilib, “Azəristiliktəchizat” ASC nə binaların və nə də ki, qazanxana və istilik mühəndis infrastrukturunun tikintisində heç bir formada iştirak etməyib, eyni zamanda həmin qazanxanaların istismarı ilə bağlı heç bir öhdəlik daşımır. Müxtəlif təşkilatlar tərəfindən tikilən qazanxanaların “Azəristiliktəchizat” ASC-nin balansına götürülməsi öhdəliyi yoxdur, bu məsələlər kiminsə şəxsi mülahizələrinə əsasən deyil, qanunvericiliklə tənzimlənir və əsassız olaraq “Azəristiliktəchizat” ASC-nin adının hallanmasını və cəmiyyət arasında çaşqınlıq yaradılmasını düzgün hesab etmirik. Digər təşkilatların, o cümlədən Qaçqın və Məcburi Köçkünlərin İşləri üzrə Dövlət Komitəsinin balansında olan qazanxanaların “Azəristiliktəchizat” ASC-nin balansına verilməsi gündəmdə deyil, qazanxanalar mülkiyyətçinin öz balansında qalmaqla qanunvericiliklə nəzərdə tutulmuş qaydada xidmət müqavilələri əsasında istismar edilə bilər”.
Qaçqın və Məcburi Köçkünlərin İşləri üzrə Dövlət Komitəsindən isə sorğumuza cavab olaraq bildirildi ki, Şirvan şəhərində istifadəyə verilmiş yaşayış kompleksində qurulmuş qazanxanaların istismara hazırlıq aktı “Azəristiliktəchizat” və digər qurumların nümayəndələri tərəfindən imzalanıb: “Dövlət Komitəsinin müraciətlərinə baxmayaraq, qazanxanalar müvafiq qaydada balansa götürülməyib. Məcburi köçkünlərin istifadə etdikləri kommunal xidmətlərə görə sayğac əsasında yaranmış borc aidiyyəti kommunal xidmət qurumlarına abunə müqaviləsi əsasında ödənilir. Dövlət Komitəsi tərəfindən aidiyyəti quruma adıçəkilən qəsəbədə sayğacların quraşdırılması üçün dəfələrlə müraciət edilib. Diqqətinizə çatdırırıq ki, məcburi köçkünlər istifadə etdikləri kommunal xidmətlərin haqqını, müvafiq fərmana əsasən, onlara dövlət tərəfindən verilən vahid aylıq müavinətdən ödəyirlər. Bununla bağlı, Dövlət Komitəsinin aidiyyəti şöbəsi, yerli nümayəndəlik və Mənzil Kommunal İstismar Sahələri tərəfindən mütəmadi olaraq məcburi köçkünlər arasında təbliğat və maarifləndirmə aparılır”.
Qaçqınkomdan həmçinin bildirilib ki, Dövlət Komitəsi problemin həlli istiqamətində işləri davam etdirəcək.
