Məşhur oyun seriyasının yeni hissəsinin musiqi dünyası artıq ekranlardan kənara çıxıb. Noyabrın 20-də Grand Theft Auto VI: The Album adlı rəsmi albom yayımlanıb. Topluda oyun üçün xüsusi olaraq dünya şöhrətli ifaçılar tərəfindən hazırlanmış orijinal mahnılar yer alır. Tam albomun təqdimatından əvvəl Rockstar Games marağı artırmaq üçün bir neçə mahnını ayrıca sinql şəklində yayımlamışdı.
Albomu hazırlamaq üçün Rockstar əfsanəvi Atlantic Records leyblı ilə əməkdaşlıq edib. Bu leyblın kataloqunda Led Zeppelin, Ed Sheeran, Twenty One Pilots və Coldplay kimi məşhur ifaçılar var. Alboma ümumilikdə 34 mahnı daxil edilib və onun ümumi müddəti 97 dəqiqədir.
Rockstar-ın sözlərinə görə, layihədə müxtəlif musiqi janrlarının sərhədlərini aşan tanınmış dünya ifaçıları iştirak edib. Onların arasında Lana Del Rey, Tame Impala, Don Toliver, Rolling Stones qrupunun gitaraçısı Keith Richards, Fred again.. və Travis Scott da var.
Alboma daxil olan bütün mahnılar oyundakı müxtəlif radio stansiyalarında səslənir. Toplunu Spotify, Apple Music və YouTube Music platformalarında dinləmək, həmçinin CD və vinil formatlarında əldə etmək mümkündür.
Lakin oyunun musiqi seçimi rəsmi albomla məhdudlaşmır. Şərq musiqi mədəniyyətinin pərəstişkarları üçün xüsusi sürpriz də hazırlanıb. Oyundakı Kaleidoscope FM radio stansiyasının pleylistinə Nelly Furtadonun məşhur Say It Right mahnısının Azərbaycan muğamı üslubunda ifası daxil edilib.
Bu versiyanı Azərbaycanın Xalq artisti Alim Qasımov və Əməkdar artist Fərqanə Qasımova Bizimkilər layihəsi çərçivəsində ifa ediblər. Kompozisiya oyunçuların və musiqi tənqidçilərinin diqqətini çəkib. Hətta GameSpot nəşri muğam elementləri ilə zəngin bu ifanı GTA VI-nın saundtrekindəki ən yaxşı mahnı adlandırıb.
Rockstar-ın musiqi yenilikləri bununla bitmir. Dekabrın 11-də Grand Theft Auto VI: Original Score adlı ikinci albom da striminq platformalarında yayımlanacaq. Burada oyunun süjet tapşırıqları zamanı səslənən orijinal instrumental musiqilər toplanacaq.
Albomun müəllifi məşhur fransız elektron musiqi dueti Justice-dir. Musiqiçilər bu buraxılışı özlərinin beşinci tamhəcmli studiya albomu hesab edir və onu oyunun hadisələrindən ayrı şəkildə də dinlənilə biləcək müstəqil musiqi əsəri kimi təqdim edirlər. Justice-in albomunun rəqəmsal versiyasına 50 kompozisiya daxil olacaq.
