Regionumuz geri çəkilən buzlaqlar səbəbindən artan risklərə məruz qalır.
Bunu COP29-un prezidenti, Azərbaycanın ekologiya və təbii sərvətlər naziri Muxtar Babayev Mərkəzi və Qərbi Asiyada Buzlaqların Əriməsinin Qarşısının Alınması üçün İqlim Dəyişikliyi və Regional Əməkdaşlıq mövzusunda keçirilən nazirlərin görüşündə deyib.
O bildirib ki, nəticədə şirin su ehtiyatları sürətlə azalır, su qıtlığına, səhralaşmaya və kənd təsərrüfatı məhsuldarlığının azalmasına səbəb olur, yaşayış və ekosistemlərə güclü təsir göstərir.
M.Babayev qeyd edib ki, Azərbaycan iqlim dəyişikliyinin təsirlərini birbaşa yaşayır, Böyük Qafqazdakı buzlaqlar əhəmiyyətli dərəcədə kiçilir:
“Azərbaycan son zamanlarda su idarəetməsini təkmilləşdirmək, resursların qiymətləndirilməsini yaxşılaşdırmaq və inteqrasiya olunmuş idarəetmə, innovativ texnologiyalar və regional əməkdaşlıq vasitəsilə iqlim risklərini həll etmək üçün Milli Su Strategiyasını qəbul edib. Cavabımız əməkdaşlıq, adaptiv və gələcəyə yönəlik olmalıdır”.
Nazir vurğulayıb ki, Azərbaycan regional tərəfdaşları ilə həmrəylik nümayiş etdirərək buzlaqların qorunması və dayanıqlı su idarəetməsinə sadiq qaldığını bir daha təsdiqləyir: “Gələcək illər ərzində maliyyələşməni səfərbər etməyi hədəfləyən transformativ “Buzlaqdan Təsərrüfata” Regional Proqramını dəstəkləyirik. Bu proqram buzlaqların əriməsinin həlli, iqlim davamlılığının artırılması və icmalarımız üçün ərzaq və su sistemlərinin təmin edilməsi üçün perspektivli həll yolu kimi xidmət edir”.
“Azərbaycan əsas sektorlar üzrə müvafiq adaptasiya tədbirlərini özündə birləşdirən milli adaptasiya planı hazırlayıb. Biz su idarəetməsinə, iqlimə davamlı infrastruktura və dayanıqlı torpaq təcrübələrinə üstünlük verməli, eyni zamanda sərhədyanı əməkdaşlıq və dialoqu təşviq etməliyik. Regionumuz iqlim adaptasiyası üçün əhəmiyyətli maliyyə çatışmazlığı ilə üzləşir. Qarşımızda duran çağırışlar böyükdür, lakin onlar eyni zamanda fürsətlərdir. Gəlin, bu fürsətdən istifadə edərək səylərimizi birləşdirək və ümumi baxışımızı konkret addımlara çevirək. Birlikdə biz buzlaqlarımızı qoruya, regional su təhlükəsizliyini təmin edə və gələcək nəsillər üçün dayanıqlı gələcək qura bilərik”, – COP29 prezidenti vurğulayıb.
