“WUF13-ün Bakıda keçirilməsi Azərbaycanın qlobal urban gündəlikdə passiv müşahidəçidən aktiv iştirakçısına keçidini nümayiş etdirir”.
Bu sözləri APA-ya açıqlamasında memar, inşaat məsələləri üzrə ekspert Muxtar Ərturan deyib.
O bildirib ki, WUF (World Urban Forum) BMT-nin şəhər inkişafı üzrə əsas qlobal platformalarından biridir: “Bu platforma şəhərsalma siyasətlərinin formalaşdığı mühitdir və burada müzakirə olunan yanaşmalar xüsusilə dayanıqlılıq, iqlim adaptasiyası və inklüziv urban inkişafı milli səviyyədə normativ və institusional çərçivələrin yenilənməsinə birbaşa təsir göstərir. Bu forum yalnız ideya mübadiləsi deyil, eyni zamanda, qlobal urban siyasətlərin istiqamətini müəyyən edən konsensus mexanizmidir. WUF13-ün Bakıda keçirilməsi Azərbaycanın bu qlobal diskursda iştirak səviyyəsinin yüksəldiyini və ölkənin regional urban inkişaf mərkəzi kimi mövqeləndiyini göstərir. Bu, xüsusilə sürətli urbanizasiya, infrastruktur transformasiyası və post-münaqişə ərazilərində yeni şəhər modellərinin qurulması kontekstində əhəmiyyətlidir.
Memarlığın sistem yönümlü rolu və şəhərsalma siyasətlərinə təsiri
Memarlıq artıq obyekt yönümlü fəaliyyət deyil, sistem yönümlü müdaxilə alətidir. Müasir dövrdə memar şəhərsalma siyasətlərində məkanın təşkilindən əlavə, sosial davranış modellərinin formalaşdırılması, resurs effektivliyi və karbon izinin optimallaşdırılması kimi kritik parametrlərə təsir edən faktor kimi çıxış edir.
WUF13 forumu çərçivəsində dayanıqlı planlama, resurs effektivliyi, iqlimə davamlı şəhər sistemləri və inklüziv inkişaf modelləri müzakirə ediləcək. Bakının ev sahibliyi burada yalnız təşkilati rol deyil. Bu, şəhərin özünü qlobal urban laboratoriya kimi təqdim etməsi və lokal təcrübəni beynəlxalq praktikalarla sintez etməsi üçün platformadır”.
WUF13 beynəlxalq təcrübənin və texnologiyaların birbaşa transferini təmin edir
Memar qeyd edib ki, WUF13 Azərbaycanın işğaldan azad olunmuş ərazilərində aparılan yenidənqurma və şəhərsalma prosesinə ciddi strateji dəyər qatır: “Bu bölgələr “sıfırdan qurulan şəhərlər” kimi müasir urban prinsiplərin tətbiqi üçün unikal imkan yaradır. Forum vasitəsilə smart şəhər modelləri, enerji effektiv həllər və dayanıqlı planlama yanaşmaları bu ərazilərdə daha sistemli şəkildə tətbiq oluna bilər.
Eyni zamanda, WUF13 beynəlxalq təcrübənin və texnologiyaların birbaşa transferini təmin edir. Bu, planlama prosesində səhvlərin minimuma endirilməsi, daha çevik idarəetmə və effektiv resurs istifadəsi deməkdir. Paralel olaraq, forum yeni investisiya imkanları yaradır və dövlət-özəl tərəfdaşlıqların genişlənməsinə təkan verir. Nəticə etibarilə, WUF13 ölkə üçün həm reputasiya kapitalı, həm də uzunmüddətli urban strategiyaların yenilənməsi baxımından kritik mərhələdir”.
About the Author
