Meksikada “Xaliskonun yeni nəsli” kartelinin liderinə qarşı əməliyyat zamanı və iğtişaşlarda azı 18 nəfər həlak olub.
Bu barədə yerli “Jornada” qəzeti məlumat yayıb.
Belə ki, “El Menço” ləqəbli Nemesio Oseguera Servantesi tutmaq üçün həyata keçirilən əməliyyat və onun ardınca baş verən iğtişaşlar zamanı Milli Qvardiyanın 15 hərbçisi həlak olub.
Bundan başqa, Puerto-Valyarta şəhərində həbsxanada baş vermiş qiyam zamanı bir mühafizəçi həlak olub, Sapopan şəhərində isə küçə atışmasında prokurorluğun işçisi güllələnib. Eyni şəhərdə atışma zamanı bir hamilə qadın həlak olub.
Xatırladaq ki, “El Menço”nun öldürülməsindən sonra kartel öz silahlılarının tam səfərbərliyini elan edib. Kartel hər öldürülmüş polis və ya hərbçiyə görə 1200 dollar mükafat vəd edib. Muzdlular ölkənin ən turistik bölgələrindən biri olan Xalisko ştatında yanğınlar törədib və yolları bağlayıblar. Əsasən Xalisko ştatında baş verən iğtişaşlar digər ştatlara da yayılıb. Qvadalaxara və Puerto-Valyarta hava limanları müvəqqəti olaraq bağlanıb.
About the Author
