Qərblə Rusiya arasında artan gərginlik fonunda Avropada yaşanan xaos və zidiyyətlər daha da dərinləşir. Bu hal özünü bəzi qitə ölkələrinin Rusiyaya münasibətində xüsusilə qabarıq şəkildə göstərməyə başlayıb. Dünənə qədər, Rusiyaya kəskin münasibətilə seçilən bəzi Avropa ölkələr indi bu məsələdə birdən-birə yumşaq mövqe sərgiləməyə başlayırlar. Bu xüsusda əsasən də Rusiya ilə sərhədə malik olan Baltikyanı ölkələr – Latviya və Estoniya daha çox seçilir.
Belə ki, Estoniya Prezidenti Alar Karis və Latviyanın Baş naziri Evika Silina Rusiya ilə əlaqələri yeniləmək üçün xüsusi Avropa elçisinin təyin edilməsini tələb ediblər.
Estoniya Prezidenti seçilmiş xüsusi elçinin həm Rusiya, həm də Ukrayna tərəfindən etibar edilən “böyük Avropa ölkəsi”ndən gəlməli olduğunu vurğulayıb.
Fransa Prezidenti Emmanuel Makron isə həftənin əvvəlində xüsusi elçinin təyin edilməsi ilə bağlı işlərin “artıq texniki səviyyədə başladığını” bildirib.
Görünən odur ki, artıq bir sıra Avropa ölkələri Moskva ilə konfrantasiyada olmaqdansa, onunla danışıqlara getməyə meyl etməyə başlayıblar.
Avropa ölkələrinin Rusiya ilə danışıqlara başlamaq istəyi nədən qaynaqlanır?
Mövzu ilə bağlı politoloq Tofiq Abbasov Bizim.Media-ya açıqlamasında bildirir ki, bəzi Avropa ölkələri, xüsusən də Rusiya ilə sərhəddə yerləşən dövlətlərin Moskva ilə danışıqlara başlamaq üçün hərəkətə gəlmələri onların artıq özlərini düşünməyə başlamaları ilə bağlıdır:
“Görürlər ki, nəhəng dövlətlər ancaq özlərini düşünür, digərlərinə isə özləri üçün yem kimi baxırlar. Avropanın lider ölkələri – Fransa, Almaniya və Böyük Britaniya Avropa İttifaqına daxil olan bir sıra dövlətlərin üzləşə biləcəyi risklərə məhəl qoymadan hamısını Rusiya ilə üz-üzə qoymaq siyasəti yürüdürlər.
Bu yolla çalışırlar ki, Rusiyanın təsir dairəsini kiçiltsinlər. Həmin güclərə vacib olan Rusiya ilə konfrantasiyanın gücləndirilməsidir. Bu səbəbdən də sözügedən 3 Avropa nəhəngi digərlərinin fikirlərinə məhəl qoymur. Yəni Paris, London, Berlin açıq şəkildə yeri gələndə bəzi subyektlərin maraqlarını düşünmədən qurban verməyə hazırdırlar”.
Ekspertin fikrincə, Baltikyanı ölkələr Rusiya ilə münasibətlərdə yaşanan gərginlik fonunda onları da Ukraynanın aqibəti gözləyə biləcəyini anlamağa başlayıblar:
“Baltikyanı ölkələr yaddan çıxarmamalıdır ki, Rusiya onların yaxın qonşusudur. Bölgənin hər üç dövlətində istehsal edilən əksər kənd təsərrüfatı, balıq məhsulları, xüsusi yeyinti məhsullarını Avropa bazarı yaxına belə buraxmır. Həmin məhsulları onlardan Rusiya alır.
Belə olan halda, Baltikyanı ölkələr görür ki, böyük güclərin oyunbazlığı nəticəsində pis vəziyyətə düşür və Rusiyanın qəzəbinə tuş gəlirlər. Baltikyanı elita, siyasi qüvvələr özünəməxsus tərzdə ayılırlar. Nəticədə anlayırlar ki, Rusiya ilə münasibətlərdə yaşanan gərginlik fonunda onları da Ukraynanın aqibəti gözləyə bilər.
Prosesdə yeni mərhələ
Politoloq qeyd edir ki, deyəsən, Estoniya və Latviyanın siyasi qüvvələri artıq oyanış dövrünə qədəm qoyurlar:
“Onlar görürlər ki, Rusiya ilə münasibətləri korlamağın xeyri yoxdur, əksinə ziyanı var. Rusiya onlar üçün bazardır. Digər tərəfdən, onlar arasında elə də ciddi antoqanizm yoxdur. Deməli, burada özünəməxsus yeni mərhələ başlamaq üzrədir”.(Bizim.Media)
