2027-ci ilə qədər ABŞ prezidenti Donald Trampın tətbiq etdiyi rüsumlar səbəbindən dünya iqtisadiyyatı böhranaqədərki ssenariyə nisbətən 2 trilyon dollar itirə bilər, lakin uzunmüddətli perspektivdə zərərin bir hissəsi istehsal zəncirlərinin yenidən qurulması ilə kompensasiya ediləcək.
Bu qiymətləndirməni “Bloomberg Economics” aparıb.
“Nəticədə rüsumlar hər kəsin qorxduğu qədər yüksək olmaya bilər. Lakin mahiyyətcə bu, qlobal ticarət mexanizmlərini çirkləndirən bir vergidir”, – Oxford Economics-in aparıcı iqtisadçısı Daniel Harenberg hesab edir.
O, həmçinin qeyd edib ki, belə siyasət investisiyalara zərər verir.
“Bloomberg” yazır ki, ABŞ-da rüsumların səviyyəsi hazırda 1930-cu illərdən etibarən ən yüksək həddədir və Trampın prezidentlik müddətinin əvvəlində olan göstəricidən, demək olar ki, 6 dəfə çoxdur. Agentliyin iqtisadçıları ABŞ-ın orta rüsumunu keçən ildəki 2,5%-ə qarşı 13,5% olaraq qiymətləndirirlər. Aİ ilə rüsumlar haqqında saziş bağlandıqdan sonra göstərici 16%-ə qədər artacaq.
Bəzi ölkələr və birliklər rüsumlarla bağlı sazişlərin bağlanmasına nail ola biliblər. Ötən gün ABŞ Aİ ilə ticarət sazişi imzaladığını elan edib. Bu, Avropa məhsulları üçün 30% əvəzinə 15% baza tarifinin müəyyən edilməsini nəzərdə tutur, eyni zamanda Brüssel ABŞ-a 600 milyard dollar investisiya qoymalı və onlardan 750 milyard dollarlıq enerji daşıyıcıları almalıdır.
