ABŞ administrasiyası Ukraynanı dəstəkləməyə davam edəcək.
Bunu Almaniya Kansleri Olaf Şolts Münxen Təhlükəsizlik Konfransı çərçivəsində bildirib.
“ABŞ müdafiə nazirindən və bir çox başqalarından eşitdiyimiz odur ki, onlar Ukraynanı dəstəkləməyə davam edəcəklər. Bu, Rusiya üçün zəruri mesajdır ki, o, dəstəyin azalacağına ümid edə bilməz. Bizim dəstəyimizi alan güclü Ukrayna Rusiya üçün güclü mesajdır”, – O.Şolts bildirib.
O vurğulayıb ki, NATO yeni üzvlər qəbul etməklə öz mövqelərini yalnız möhkəmləndirir.
Almaniya Kanslerinin sözlərinə görə, ABŞ və Avropa İttifaqı arasında təhlükəsizlik sahəsində parçalanma yoxdur: “Biz həmişə bu prosesə cəlb olunmuşuq. Avropa ölkələrinə qarşı hər hansı təcavüz olarsa, ABŞ mütləq təhlükəsizlik məsələsində dəstək göstərməyə cəlb olunacaq”.
