Cənubi Koreya Rusiya və Şimali Koreya arasında “qanunsuz hərbi əməkdaşlıqda” iştirak edən 11 fiziki şəxs və 15 təşkilata qarşı birtərəfli sanksiyalar tətbiq edib.
Bu barədə Koreya Respublikasının Xarici İşlər Nazirliyi məlumat yayıb.
“Hökumət Rusiya və Şimali Koreya arasında qanunsuz hərbi əməkdaşlıqda, həmçinin Şimali Koreyanın nüvə və raket proqramlarının maliyyələşdirilməsi, eləcə də material təminatında iştirak edən 11 fiziki şəxs və 15 təşkilata qarşı birtərəfli sanksiyalar tətbiq edir. Bu, BMT Təhlükəsizlik Şurasının çoxsaylı qətnamələrini pozur”, – məlumatda bildirib.
Bildirilib ki, sanksiyalar dekabrın 19-u gecə yarısı qüvvəyə minəcək. Sanksiya tətbiq edilən subyektlərlə bütün maliyyə və valyuta əməliyyatları Maliyyə Xidmətləri üzrə Komissiyanın və ya Koreya Mərkəzi Bankının əvvəlcədən icazəsini tələb edir. Sanksiyaları pozanlar mövcud qanunvericiliyə uyğun olaraq məsuliyyətə cəlb olunacaqlar.
