Azərbaycan son illərdə fəal xarici siyasət, enerji və nəqliyyat diplomatiyasının inkişafı, hərbi potensialın artırılması və qlobal təşəbbüslərdə iştirakı sayəsində beynəlxalq arenada mövqelərini möhkəmləndirib və orta güc statusunu formalaşdırıb.
Bu barədə “EU Reporter”in məqaləsində bildirilib.
Məqalə müəllifləri Azərbaycanın orta güc kimi qiymətləndirilməsinə əsas verən başlıca amillər sırasında ölkənin fəal və çoxşaxəli xarici siyasətini qeyd edirlər. Qeyd olunub ki, Azərbaycan Türk Dövlətləri Təşkilatı (TDT), Qoşulmama Hərəkatı, İslam Əməkdaşlıq Təşkilatı, ATƏT və BMT də daxil olmaqla, beynəlxalq platformalarda nəzərəçarpacaq rol oynayır.
Məqalədə vurğulanıb ki, rəsmi Bakının xarici siyasət kursu həm regional, həm də qlobal səviyyələrdə sabitliyin, əməkdaşlığın və dayanıqlı inkişafın möhkəmləndirilməsinə yönəlib.
“Azərbaycanın çoxtərəfli diplomatiyada fəal iştirakı, beynəlxalq təşkilatlar çərçivəsində təşəbbüsləri və regional əməkdaşlıq layihələri onun beynəlxalq sistemin konstruktiv iştirakçısı kimi mövqelərini möhkəmləndirir. Eyni zamanda, Ermənistanla davamlı sülhün əldə olunması istiqamətindəki səylər Azərbaycanın regional siyasətinin əsas prioritetlərindən biri olaraq qalır. Beləliklə, orta güc kimi ölkənin xarici siyasəti yalnız milli maraqların qorunmasına deyil, həm də Cənubi Qafqazda və onun xaricində sülhün, təhlükəsizliyin və əməkdaşlığın möhkəmləndirilməsinə xidmət edir”, – nəşrdə qeyd olunub.
Müəllif Azərbaycanın geostrateji mövqeyinə xüsusi diqqət çəkir. Onun sözlərinə görə, ölkə Şərq–Qərb və Şimal–Cənub nəqliyyat marşrutlarının kəsişməsində yerləşir, bu da onun beynəlxalq logistikada əhəmiyyətini xeyli artırır.
“Bakı–Tbilisi–Qars dəmir yolu, Orta Dəhliz və Şimal–Cənub Beynəlxalq Nəqliyyat Dəhlizi kimi layihələr Azərbaycanın regional nəqliyyat-logistika habı kimi rolunu gücləndirir”, – məqalədə bildirilib.
Azərbaycanın beynəlxalq təsirinin ən mühüm alətləri sırasında “EU Reporter” enerji diplomatiyasını da qeyd edir. Vurğulanıb ki, Azərbaycan Cənub Qaz Dəhlizi, TANAP və TAP layihələrinin icrası sayəsində enerji təhlükəsizliyi sahəsində Avropanın əsas tərəfdaşlarından birinə çevrilib.
“Xüsusilə Rusiya–Ukrayna münaqişəsi başladıqdan sonra Avropa İttifaqının enerji tədarükünün diversifikasiyası siyasəti üçün Azərbaycanın əhəmiyyəti xeyli artıb. Bundan əlavə, Azərbaycan regionda ən güclü hərbi potensiallardan birinə malikdir. 2020-ci ildə İkinci Qarabağ müharibəsindəki qələbə və ölkənin ərazi bütövlüyünün bərpası onun hərbi imkanlarını və strateji çəkisini əhəmiyyətli dərəcədə gücləndirib. Hərbi qüdrətin və diplomatik potensialın vəhdəti Azərbaycanın orta güc kimi statusunu möhkəmləndirən əsas amillərdən biri olaraq qalır”, – materialda bildirilib.
