Avropa İttifaqının Rusiyaya qarşı hazırladığı 21-ci sanksiyalar paketinə ölkənin aparıcı neft şirkətlərindən olan “LUKOIL” və “Rosneft”in də daxil edilə biləcəyi bildirilir.
Brüsseldə müzakirə olunan yeni məhdudiyyətlər Rusiya iqtisadiyyatının əsas gəlir mənbələrindən hesab olunan enerji sektorunu hədəf alır. Məlumatda qeyd olunur ki, “LUKOIL” və “Rosneft”ə qarşı sanksiyalarla yanaşı, Rusiyanın “kölgə donanması” kimi tanınan tanker şəbəkəsinə qarşı da əlavə tədbirlər nəzərdən keçirilir.
Mövzunun diqqət çəkən tərəflərindən biri isə “LUKOIL”un ən böyük səhmdarı olan Azərbaycan mənşəli rusiyalı iş adamı, milyarder Vahid Ələkbərovun adının yenidən gündəmə gəlməsidir.
Uzun illər “LUKOIL”a rəhbərlik etmiş Vahid Ələkbərov şirkətin ən iri səhmdarlarından biri olaraq qalır. Beynəlxalq maliyyə reytinqlərinə görə onun sərvəti təxminən 28-30 milyard dollar həcmində qiymətləndirilir və o, postsovet məkanının ən zəngin iş adamları sırasında yer alır.
Avropa İttifaqının enerji sektoruna yönəlmiş yeni sanksiyaları qəbul edilərsə, bu, “LUKOIL”un Avropadakı fəaliyyət imkanlarına, beynəlxalq əməliyyatlarına və investisiya layihələrinə əlavə təzyiq yarada bilər.
Qeyd edək ki, Aİ-nin yeni sanksiyalar paketinin iyunun sonu və ya iyulun əvvəlində təqdim olunacağı gözlənilir. Paketdə Rusiya bankları, maliyyə institutları və enerji sektorunda fəaliyyət göstərən iri şirkətlərə qarşı məhdudiyyətlərin yer alacağı bildirilir.
