Yaxın ətrafımızda baş verən böhranlar Türk dünyasının həmrəylik içində hərəkət etməsinin strateji əhəmiyyətini bir daha ortaya qoyub.
Bunu Türkiyə Prezidenti Rəcəb Tayyib Ərdoğan Türk Dövlətləri Təşkilatının Dövlət başçılarının qeyri-rəsmi Zirvə görüşündə bildirib.
“Yaxın ətrafımızda baş verən böhranlar Türk dünyasının həmrəylik içində hərəkət etməsinin strateji əhəmiyyətini bir daha ortaya qoyub. Geosiyasi sınaqlar qarşısında məsləhətləşmə mexanizmlərimizi və koordinasiyamızı gücləndirməliyik. TDT+ formatının ən qısa zamanda həyata keçirilməsini faydalı hesab edirik. Bizim və nazirlərimizin artan təmasları türk dövlətlərinin artıq ortaq məsələlər qarşısında yüksək səviyyəli reflekslər qazandığını təsdiqləyir.
Bu gün Hörmüz boğazı mərkəzli böhranın göstərdiyi kimi, Orta Dəhliz başda olmaqla türk dünyasını bir-birinə bağlayan nəqliyyat layihələri uzun illər ərzində prioritetimiz olaraq qalacaq. Yüksək texnologiyalar əsasında formalaşdırdığımız müdafiə sənayesində qazandığımız təcrübəni təşkilatımızın üzvləri ilə bölüşməyə hazırıq. Təşkilatımız çərçivəsində müdafiə sənayesi qurumlarının toplantılarının mütəmadi keçirilməsinə böyük önəm veririk. Noyabr ayında ölkəmizdə keçiriləcək COP31 İqlim Konfransını süni intellekt və rəqəmsal texnologiyaların təqdim etdiyi imkanları ön plana çıxaran yanaşma ilə təşkil etməyi planlaşdırırıq. Bundan əlavə, kənd təsərrüfatı istehsalının dəstəklənməsi üçün texnologiyanın imkanlarından maksimum istifadə etməyi hədəfləyən bir transformasiya prosesindəyik”, – Türkiyə Prezidenti qeyd edib.
