2013-cü ilin bu günündə Avstriyanın paytaxtı Vyanada Azərbaycan Mədəniyyət Mərkəzinin açılışı olub. Prezident İlham Əliyev və xanımı Mehriban Əliyeva mərasimdə iştirak ediblər. Mərkəz Prezident İlham Əliyevin 2012-ci il 16 noyabr tarixli Sərəncamı əsasında, Avstriyada ölkəmizin mədəniyyətini təbliğ etmək məqsədilə yaradılıb.
Bəs, mayın 13-də dünyada daha hansı hadisələr baş verib?
1. 13 may 1277-ci ildə Qaramanoğlu Mehmet Bəy Konya şəhərini Qaramanoğulları torpaqlarına daxil etdi və türkcəni rəsmi dil elan etdi.
2. 1846-ci ildə ABŞ Konqresi sərhəddəki keşik hissələrinə basqın edilməsini amil kimi göstərərək Meksikaya müharibə elan edib.
3. 13 may 1920-ci ildə Ədirnə Konqresi başa çatıb. Birinci Dünya müharibəsi nəticəsində Antanta dövlətlərinin Şərqi Trakiyanı yunanlara vermə qərarı qarşısında yığıncaq keçirilən Ədirnə Konqresində Trakiyanın heç bir şərt daxilinda yunanlara təslim edilməyəcəyi qərara alınıb.
4. 1930-cu ilin 13 may tarixində sonuncu vəhşi Tasmaniya canavarı öldürülüb.
5. 13 may 1950-ci ildə İngiltərənin Silverstoun şəhərində ilk “Formula-1” çempionatının ilk yarışı keçirilib. Yarışların ilk qalibi 44 yaşlı italiyalı pilot Cuzeppe Nino Farina olub.
6. 13 may 1981-ci ildə Papa II Jan Paul Mehmet Əli Ağca tərəfindən vurularaq yaralanıb.
7. 2005-ci ilin bu günündə Özbəkistanın Əndican şəhərində əsgərlərin etirazçılara atəş açması nəticəində yüzlərlə insan öldürülüb.
8. 2014-cü il mayın 13-də Türkiyədə Soma kömür mədənində faciə baş verib. Hadisə nəticəsində 301 mədənçi ölüb, 80-dən çoxu yaralanıb. Türkiyə, Şimali Kıbrıs Türk Cümhuriyyəti və Pakistanda milli matəm elan olunub.
13 may tarixində bu şəxsiyyətlər xatırlanır:
1. 1096-cı ilin bu günündə Azərbaycanda intibah dövrünün ilk qadın şairi, dahi rübai ustası, ilk şahmatçı qadın, N.Gəncəvinin müasiri Məhsəti Gəncəvi anadan olub (1096-1160).
2. 13 may 1929-cu ildə. Azərbaycan şairi, tərcüməçi, Əməkdar İncəsənət Xadimi Hikmət Ziya anadan olub (1929-1995).
3. 1943-ci ilin bu günündə Azərbaycanın Xalq Yazıçısı, nasir, dramaturq, tənqidçi, ədəbiyyatşünas, ictimai xadim, professor Elçin Əfəndiyev dünyaya gəlib.
4. Bu gün dünya şöhrətli Azərbaycan bəstəkarı, SSRİ Xalq artisti Qara Qarayevin anım günüdür. O 1982-ci ilin may ayının 13 –də 64 yaşında dünyasını dəyişib.
5. 13 may 1809-cu ildə Azərbaycan poeziyasının tanınmış simalarından biri Molla Vəli Vidadi vəfat edib.
6. Vətən Müharibəsi Qəhrəmanı Mehrab Niftəliyev 13 may 1985-ci ildə anadan olub( 1985-2020) ( Bizim.Media)
