Naxçıvan Muxtar Respublikasında əhalinin içməli su təminatını yaxşılaşdırmaq üçün yeni içməli su xətləri çəkilib, mövcud xətlərdə təmir-bərpa işləri yerinə yetirilib.
Bu barədə “Report”un yerli bürosuna muxtar respublikanın “Meliorasiya və Su Təsərrüfatı” ASC-dən məlumat verilib.
Qeyd olunub ki, Şərur rayonunda 0,66 kilometr, Babək rayonunda 0,86 kilometr, Ordubad rayonunda 0,14 kilometr içməli su xətləri çəkilib, Şərur rayonunda 0,34 kilometr, Babək rayonunda 1,27 kilometr, Şahbuz rayonunda 0,4 kilometr, Culfa rayonunda 0,68 kilometr, Ordubad rayonunda 2,5 kilometr, Kəngərli rayonunda isə 0,11 kilometr mövcud içməli su xətlərində təmir-bərpa işləri aparılıb.
Bundan əlavə, içməli su təminatını yaxşılaşdırmaq məqsədilə Babək rayonunun Çeşməbasar kəndində 3 288 metr ana boru, 3 000 metr paylayıcı boru, Güznüt kəndində 2 650 metr paylayıcı boru, Culfa rayonunun Dizə kəndində isə yeni tikilmiş subartezian quyusundan 2 395 metr suaparıcı boru xətti çəkilib. Ordubad rayonunun Dəstə kəndini içməli su ilə təmin etmək üçün yeni tikilmiş kaptajdan 1 200 metr suötürücü boru xətti çəkilib.
Bu müddət ərzində nasos stansiyalarında və təzyiqli boru xətlərində cari təmir işləri davam etdirilib. Şərur rayonunda “Həmzəli-2”, “Zeyvə-1”, “Muğanlı” nasos stansiyalarının təzyiqli boru xətlərində 1,37 kilometr, Babək rayonunda “Araz-1”, “Araz-2” və “Nehrəm” nasos stansiyalarının təzyiqli boru xətlərində 0,01 kilometr, Şahbuz rayonunda “Mahmudoba”, “Daylaqlı”, “Şahbuzkənd”, “Əcəmi-1”, “Əcəmi-2” nasos stansiyalarının və Ayrınc, Şada kəndlərinin subartezian quyularının təzyiqli boru xətlərində 0,24 kilometr, Culfa rayonunda Bənəniyar su anbarının, Kırna və Bənəniyar nasos xətlərinin təzyiqli boru xətlərində 0,13 kilometr, Ordubad rayonunda “Dəstə-2” və “Əylis-1” nasos stansiyalarının təzyiqli boru xətlərində 0,2 kilometr, Kəngərli rayonunda “Qıvraq-1”, “Qıvraq-2”, “Kərki”, “Şahtaxtı” və “Yeni Kərki” nasos stansiyalarının təzyiqli boru xətlərində 0,22 kilometr, Naxçıvan şəhərində “Qaraçuq-1” və “Qaraçuq-2” nasos stansiyalarının təzyiqli boru xətlərində isə 0,01 kilometr təmir-bərpa işləri aparılıb.
Bu ilin yanvar-mart ayları ərzində 2 kəhrizdə cari təmir işləri başa çatdırılıb, 2 kəhrizdə isə cari təmir işləri davam etdirilib. Ötən dövr ərzində kəhrizlərdə 750 metr kürə təmizlənib, 20 metr saybənd hörülüb.
Suvarma və içməli su mənbəyi kimi istifadə olunan subartezian quyularının 8 ədədinə yeni nasos quraşdırılmaqla, 88 ədədi əsaslı təmir olunub. Bundan əlavə, Culfa rayonunun Dizə kəndinin su təminatını yaxşılaşdırılmaq məqsədilə 1 yeni subartezian quyusunun tikintisi başa çatdırılaraq, istifadəyə verilib.
“Rayon mərkəzi və ətraf kəndlərin içməli su təchizatı və kanalizasiya sistemlərinin yenidənqurulması” layihəsi çərçivəsində Babək rayonunun Nehrəm qəsəbəsində içməli su və kanalizasiya şəbəkəsinin tikintisi davam etdirilib. Ərazidə 102 evin içməli su xəttinə, 482 evin isə kanalizasiya xəttinə birləşməsi aparılıb.
Sədərək rayonunun Dəmirçi kəndinin içməli su şəbəkəsinin tikintisi işləri başa çatdırılıb.
