Sosial şəbəkələrdə Naxçıvan Dövlət Universitetinin beynəlxalq əlaqələr üzrə prorektoru Seymur Talıbovun vəzifəsindən azad edildiyi barədə məlumat yayılıb.
Metbuat.az-ın sorğusuna cavab olaraq universitetdən bildirilib ki, bu barədə hələ heç bir rəsmi qərar yoxdur:
“Bu barədə heç bir fakt, qərar yoxdur. Bu səbəbdən məlumatın doğru və ya yanlış olduğunu deyə bilmirik”, – cavabda qeyd edilib.
Qeyd edək ki, Seymur Talıbov Naxçıvan Muxtar Respublikası Ali Məclisinin sədri Vasif Talıbovun oğludur.
O, 1988-ci ilin yanvarın 19-da Naxçıvan şəhərində anadan olub. 1994-2003-cü illərdə Naxçıvan şəhər 12 saylı orta məktəbdə təhsil alıb.
2003-2007-ci illərdə Bakı Dövlət Universitetinin Beynəlxalq hüquq və Beynəlxalq Münasibətlər fakültəsində bakalavr alıb, ardınca 2007-2010-cu illərdə Bakı Dövlət Universitetinin beynəlxalq hüquq ixtisası üzrə qiyabi magistratura təhsili alıb.
Həmçinin Talıbov 2009-2010-cu illərdə magistratura təhsilini İngiltərənin London City Universitetində Beynəlxalq siyasət üzrə davam etdirib. 2011-ci ilin yanvar ayından Naxçıvan Dövlət Universitetinin Beynəlxalq Münasibətlər kafedrasında müəllim, 2013-cü ildən isə baş müəllim işləyir.
2012-ci ildən Naxçıvan Dövlət Universitetində beynəlxalq hüquq üzrə qiyabi doktorant olub, dissertasiya müdafiə edərək hüquq üzrə fəlsəfə doktoru alimlik dərəcəsi alıb.
2017-ci ildən NDU-nun dosenti, 2011-ci ildən YAP-ın üzvüdür. 2015-ci ildən Naxçıvan Muxtar Respublikası Ali Məclisinin deputatıdır.
1 monoqrafiya və 11-dən çox elmi məqalənin müəllifidir.
Metbuat.az
About the Author
