“Demək olar ki, artıq Ağdam şəhərinə qədər dəmir yolu çəkilib. Ümumi ox üzə 47,1 km uzunluğunda dəmir yolu xəttinin inşası yekunlaşmaq üzrədir”.
Bu sözləri “Azərbaycan Dəmir Yolları’’ QSC-nin (ADY) Tikinti layihələrinin idarə olunması departamentinin müdiri Tural Abbaslı deyib.
O bildirib ki, həmçinin Bərdə, Köçərli və Təzəkənd stansiyalarında tamamlanma işləri davam edir: “Ağdam dəmir yolu və avtovağzal kompleksinin isə layihəsi tamamlanıb, gələn ilin əvvəlindən tikinti işlərinin başlaması nəzərədə tutulub. 2024-cü ilin sonuna bu yolu tam bitirib təhvil verməyi düşünürük. Qeyd olunan yolun davamı olaraq, Ağdam-Xankəndi dəmir yolunun layihələndirmə işlərinə başlamışıq və artıq yerində baxış keçirilərək dəmir yolunun marşrutu ilkin olaraq müəyyən olunmuşdur. Gələn ildən bu yolun tikinti işlərinə başlamağı planlaşdırırıq. Bu xəttin əsas təyinatı Xankəndi və Şuşa şəhərlərinə, həmçinin ətraf kənd və qəsəbələrə sərnişinlərin və eyni zamanda yüklərin daşınması fəaliyyəti ilə bağlı olacaq. Bu isə öz növbəsində azad olunmuş ərazilərdə yenidənqurma və bərpa işlərinin daha da sürətlənməsinə təkan verəcəkdir.
Biz, həmçinin Yevlax-Bərdə layihəsinin (Bakı – Böyük Kəsik dəmir yolu xəttinin Qarabağa gedən qolu) texniki-iqtisadi əsaslandırılması işlərini də yekunlaşdırmışıq”.
