Türkiyə Prezidenti Rəcəb Tayyib Ərdoğan iyul ayında bir neçə xarici səfərdə olacaq.
Bu barədə Türkiyə mətbuatı yazıb.
Bildirilib ki, Ərdoğan 3-4 iyul tarixlərində Astanada keçirilən Şanxay Əməkdaşlıq Təşkilatının sammitində iştirak edəcək. Ərdoğanın burada Rusiya Prezidenti Vladimir Putinlə görüşəcəyi ehtimal olunur.
Astanadan sonra Ərdoğan 5-6 iyul tarixlərində Azərbaycana gələcək. Türkiyə Prezidenti Azərbaycan Prezidenti İlham Əliyevlə görüşəcək, Türk Dövlətləri Təşkilatının Şuşada keçiriləcək sammitinə qatılacaq.
Daha sonra Türkiyə prezidenti 9-11 iyul tarixlərində NATO liderlərinin sammitinə qatılmaq üçün Vaşinqtona yola düşəcək. Ərdoğan burada ABŞ Prezidenti Co Bayden başda olmaqla NATO liderləri ilə görüşəcək.
Vaşinqtondan qayıtdıqdan sonra Ərdoğan Kipr Sülh Hərəkatının 50 illiyi münasibətilə keçirilən tədbirlərə qatılmaq üçün Şimali Kiprə səfər edəcək. Ərdoğan hətta Şimali Kiprdəki tədbirlərə CHP sədri Özgür Özəli də dəvət edib.
