Ermənistan parlamentinin hakim “Mülki müqavilə” fraksiyasının katibi Artur Hovhannisyan deyib ki, qondarma “Artsaxın prezidenti” Samvel Şahramanyan agent davranışını nümayiş etdirir.
Artur Hovhannisyan Samvel Şahramanyana digər iradlar da səsləndirib.
“Yenə də mühacirətdəki hansısa “hökumət” haqqında qəribə bəyanatlar verir. Qəribədir ki, bu bəyanatlar “Dağlıq Qarabağ”ın ləğvi ilə bağlı sənədi imzalayan şəxs tərəfindən səsləndirilir”.
Hovhannisyan deyib ki, Şahramanyanın bəyanatları Ermənistan dövlətçiliyinə qarşı yönəlib və xarici qüvvələrə xidmət edir.
“Göründüyü kimi, Samvel Şahramanyan artıq agent davranışını nümayiş etdirir ki, bu da ən azı müvafiq strukturların diqqətini cəlb etməli idi”, – o vurğulayıb.
“Ermənistanda bir hakimiyyət, bir güc var və dövlətçiliyimizə qarşı atılan ən kiçik addım belə ən sərt cavabını almalıdır”, – deputat qeyd edib.
Xatırladaq ki, baş nazir Nikol Paşinyan da bu gün bildirib ki, Qarabağdan köçmüş bəzi qüvvələr bilərəkdən və ya bilməyərəkdən Ermənistanın milli təhlükəsizliyinə təhdid yaradan hərəkətlər və addımlar atırlar. O bunu deyərkən Qarabağdan qovulmuş separatçıların sonuncu başçısı Samvel Şahramanyan Fransanın “Le Figaro” nəşrinə müsahibəsində səsləndirdiyi fikirlər istinad edib.
Şahramanyan “Le Figaro”ya müsahibəsində separatçıların “mühacirət hökuməti”ndən danışıb. Deyib ki, İrəvanda əyləşdiyi binada “Artsaxın Prezident Aparatı, qanunvericilik və hüquq-mühafizə orqanları yerləşir:
“Parlament üzvləri səs vermək üçün burada görüşə bilərlər… Ötən ilin oktyabrında mən sərəncam imzaladım ki, hökumət üzvləri istəsələr, öz vəzifələrində qala bilərlər”.
